ग्रामीण भागातील लघुउद्योग व महिला बचतगटांसाठी "आठवडी बाजार" संकल्पना उपयुक्त
ज्ञानेश्वर बागडे-कर्जत
याप्रसंगी "मदर आय फाउंडेशन" कर्जतचे आशिष लाड, धनंजय मोरे, दिनेश बडेकर, तसेच महाराष्ट्र राज्य ग्रामीण जीवनोन्नती अभियानाचे जिल्हा व्यवस्थापक सिद्धेश राऊळ व चंद्रशेखर पाटील, कर्जत तालुका अभियान व्यवस्थापक ललिता तेलवणे, तालुका व्यवस्थापक राजू नेमाडे व सद्भावना फाउंडेशन कर्जतच्या सुनंदा लाड आदी मान्यवर उपस्थित होते.
समाजव्यवस्थेतील मध्यमवर्गीय कुटुंबातील दुर्बल घटकांना आशेचा किरण म्हणून स्वयंसहाय्यता बचतगटाकडे पाहिले जाते. देशातील कोट्यवधी महिलांच्या आर्थिकच नाही तर समग्र भवितव्याला आकार देण्याचे काम बचतगटाच्या माध्यमातून अविरत सुरू आहे. बचतगट म्हणजे महिला सक्षमीकरणाची उज्वल दिशा आहे. बचतगटाच्या माध्यमातून अनेक महिलांना संघटित करून त्यांचे जीवनमान उंचाविले जात आहे. त्यांच्या प्रयत्नांना यश मिळवून देण्यासाठी ही संकल्पना मोलाची ठरेल असे सिद्धेश राऊळ यांनी स्पष्ट केले.
याप्रसंगी कर्जत तालुक्यातील स्थानिक बचतगटातील महिला, शेतकरी महिला, आदिवासी व ग्रामीण महिला यांच्या स्थानिक व्यवसायांना प्रोत्साहन देऊन महिलांचा सामाजिक आणि आर्थिक स्तर उंचावणे, स्थानिक लघु आणि कुटीर उद्योगांना प्रोत्साहन देणे,नगरपरिषद हद्दीत एक हक्काची बाजारपेठ निर्माण करून आदर्श निर्माण करणे, ही व अशा प्रकारची अनेक उद्दिष्टे साध्य करता येऊ शकतील, असे मत "मदर आय" फाऊंडेशनचे आशिष लाड यांनी व्यक्त केले.
कर्जत नगरपरिषद हे तालुक्याचे ठिकाण असल्यामुळे हद्दीमध्ये सध्या ग्रामीण भागातून मोठ्या प्रमाणात स्थलांतर होत असून तालुक्याची उपलब्ध बाजारपेठही मर्यादित व छोटी असल्याने तालुक्याची एकाच ठिकाणावर खरेदी होते. आठवडी बाजाराच्या माध्यमातून विविध गृहोपयोगी वस्तू व खाद्यपदार्थ ग्राहकांसाठी उपलब्ध केले जाऊ शकतात.
