गांधील माशीच्या हल्ल्यात दोन मुलींचा दुर्दैवी मृत्यू साताऱ्यातील ढेबेवाडी येथील घटना
प्रतिक मिसाळ -सातारा
गांधील माशांनी केलेल्या जोरदार हल्ल्यात घराच्या गच्चीवर खेळणाऱ्या दोन मुलींचा मृत्यू झाल्याची घटना महिंद ( ता . पाटण ) येथील बौद्धवस्तीत घडली आहे . अनुष्का दिनेश यादव ( वय १२ ) आणि शेजल अशोक यादव ( वय आठ ) अशी मुलींची नावे आहेत . या घटनेत आणखी पाचजण जखमी झाले आहेत . घटनास्थळावरुन मिळालेल्या माहितीनुसार सोमवारी ( ता .26 ) सायंकाळी पाचच्या सुमारास महिंद येथील बौद्धवस्तीतील तुकाराम ज्ञानू यादव यांच्या घराच्या गच्चीवर अनुष्का , शेजल व आणखी एक लहान मुलगा असे तिघेजण खेळण्यास गेलेले होते . त्यावेळी त्यांच्या घरापाठीमागे असलेल्या मोठ्या झाडाच्या फांद्यांवरून उड्या मारणाऱ्या वानरांच्या कळपाचा लगतच्याच पडक्या घराच्या छप्परास असलेल्या गांधील माशांच्या पोळ्याला धक्का लागला . त्यामुळे चवताळलेल्या माशांनी गच्चीवर खेळणाऱ्या मुलांवर जोरदार हल्ला चढवला . मुलांचा आरडाओरडा ऐकून मदतीसाठी गच्चीवर धावलेल्या यादव कुटुंबियातील काही जणांनाही माशांनी चावा घेत जखमी केले . त्यानंतर तातडीने अनुष्का , शेजल व अन्य जखमींना उपचारासाठी तळमावले येथील खासगी दवाखान्यात नेण्यात आले . त्यापैकी अनुष्काचा उपचारा दरम्यान काही वेळानी तर रात्री एकच्या सुमारास शेजलचाही मृत्यू झाला . अनुष्काचे मुळगाव येळगाव ( ता कराड ) असून काही दिवसांपूर्वीच ती आपल्या आजोळी महिंद येथे आली होती . या घटनेने परिसरात हळहळ व्यक्त होत आहे .
