Hot Widget

Type Here to Get Search Results !

Comments

घंटागाडीच्या गाण्यामुळे विरोधकांनी पालिकेचे अस्तित्व मान्य केले: उपनगराध्यक्ष मनोज शेंडे

 घंटागाडीच्या गाण्यामुळे विरोधकांनी पालिकेचे अस्तित्व मान्य केले: उपनगराध्यक्ष मनोज शेंडे 

प्रतीक मिसाळ सातारा

घंटागाड्यांच्या गाण्यांमुळे नगरपरिषदेचे अस्तित्व मान्य करताना त्यांनी स्वच्छता विकासाची अप्रत्यक्ष कबुली आपणहून दिली आहे . त्यांनी केलेल्या टिकात्मक सूचनांचा आदर करुन सातारकरांसाठी सातारा विकास आघाडी अधिक गतीने कार्यरत राहील , अशी टीका सातारा पालिकेचे उपनगराध्यक्ष मनोज शेंडे यांनी कोणाचेही नाव न घेता केली आहे . याबाबत प्रसिध्दीस दिलेल्या पत्रकात नमूद केले आहे की , कोरोनावर नियंत्रण ठेवण्याच्या दृष्टीने सातारा पालिका सुरुवातीपासूनच कार्यरत आहे . खावली येथील विलगीकरण केंदामध्ये सर्व मुलभूत सेवा पालिकेमार्फत दिल्या जात आहेत . तसेच कात्रेवाडा शाळा येथील विलगीकरण केंद्राला पालिकेने सर्व मुलभूत सुविधा पुरविल्या आहेत . कोरोना मृतांचे अंत्यसंस्कार देखील पालिका स्वखर्चाने करीत आहे . लसीकरणासाठी लस उपलब्ध करुन घेवून कस्तुरबा प्राथमिक आरोग्य केंद्र , गोडोली आरोग्य केंद्र , शाहुपूरी ग्रामपंचायत इमारतीमधील लसीकरण केंद्र , शानभाग विद्यालय , श्रीपतराव पाटील हायस्कूल - करंजे , पिरवाडी , विलासपूर , विक्रांतनगर , चंदननगर , विशाल सह्याद्री शाळा शाहुनगर येथे लसीकरण केंद्र सुरु केली आहेत. 

कोरोना प्रतिबंधासाठी पालिका विविध उपाय राबवित असल्यानेच पालिकेने स्वतंत्र विलगीकरण कक्ष सुरु केला नाही . त्यामुळे पालिकेचे अस्तित्व दिसत नाही अशी टीका करणे योग्य नाही . तरी सुध्दा केलेल्या टिकेचा सकारात्मकतेने विचार करुन , पालिकेमार्फत आणखी काही उपाययोजना गतीने राबविण्याकरीता सातारा विकास आघाडी कटीबध्द आहे . घंटागाड्यांच्या गाण्यांमुळे पालिकेचे अस्तित्व ज्यांनी मान्य केले , त्यांनी अप्रत्यक्षपणे स्वच्छतेच्या बाबतीत नगरपरिषद सक्षमपणे काम करीत आहे , अशी एक प्रकारे कबुलीच दिली आहे असेच म्हणावे लागेल . कसेही असले तरी त्यांच्या टिकेतून आदरपूर्वक चांगले काम करण्याचा प्रयत्न खासदार उदयनराजे भोसले यांच्या नेतृत्वाखाली पालिकेच्या माध्यमातून केला जाईल , असेही मनोज शेंडे यांनी नमूद केले आहे .


 सातारा विकास आघाडीच्या स्वच्छतेच्या कामाच्या निव्वळ गप्पाच: नगरसेवक अमोल मोहिते


घंटा गाडयांवरील गीतामुळे निर्माण झालेल्या सातारा नगरपालिकेच्या अस्तित्वापेक्षाही सातारा विकास आघाडीच्या काळातील भ्रष्टाचार आणि टक्केवारीच्या बजबजपूरीने बरबटलेल्या कारभाराचा गवगवा अधिक झाल्यानेच सातारा नगर पालिकेचे नाव सर्वदूर पोहचले आहे . कोविड प्रतिबंधीत लसीकरण कार्यक्रम अंमलबजावणीत काडीचे योगदान नसणारी सातारा विकास आघाडी ही निवडणूकीच्या तोंडावर केवळ पेपरबाजी करीत आहे . स्वच्छतेच्या नावाखाली आख्या नगरपालिकेच्या तिजोरीचाच सुफडा साफ करणा - या सातारा विकास आघाडीने स्वच्छतेच्या गप्पा मारणे म्हणजे करून करून भागले , असाच प्रकार असल्याचा टोला नगर विकास आघाडीचे पक्ष प्रतोद व नगरसेवक अमोल मोहिते यांनी लगावला आहे . साता - यात आता हंडे मोर्चे का निघत नाहीत याची पार्श्वभूमी जाणून घेवून उपनगराध्यक्ष मनोज शेंडे यांनी अभ्यास करण्याची गरज आहे . स्वर्गीय श्रीमंत छत्रपती अभयसिंहराजे भोसले तथा भाऊसाहेब महाराज यांच्या दूरदृष्टीमुळे सातारा शहराला नवसंजीवनी ठरलेली शहापूर पाणी पुरवठा योजना आकाराला आली ही योजना खर्चीक असल्याची ओरड तुमच्या नेत्यांनी केली होती . या योजनेमुळेच सातारकरांचा पाणी पुरवठा सुरळीत झाला . हे मात्र तुम्ही सोईस्कररित्या विसरलात . नंतरच्या काळात शिवेंद्रसिंहराजे भोसले यांच्या शासन पातळीवरील सातत्यपूर्ण पाठपुराव्यामुळे आणि प्रयत्नामुळेच कास धरण उंची वाढीचा प्रश्न मार्गी लागला . कासच्या उंची वाढ प्रस्तावास मंजूरी मिळवून देण्याबरोबरच त्यानंतर रखडलेल्या कामांना निधी मिळवून देण्याचे कामही शिवेंद्रसिंहराजे भोसले यांच्यामुळेच झाल्याने सातारकर नागरीकांच्यावर हंडे मोर्चे काढण्याची वेळ आली नाही .

खोटं आणि ते ही रेटून बोलण्यात माहीर असलेलेच सध्याच्या कोरोनाच्या साथीच्या काळात विलगीकरण केंद्र व लसीकरणाच्या कार्यक्रमात कसलेच योगदान नसताना जनतेची दिशाभूल करीत आहेत . विलगीकरण केंद्रासाठी शासनाच्या माध्यमातून जिल्हा प्रशासनाचे जिल्हाधिकारी व प्रांताधिकारी काम करीत आहेत . तर लसीकरण मोहीम राज्य व केंद्र शासनाच्या माध्यमातून जिल्हा परिषदेचा आरोग्य विभाग राबवित आहे . असे असतानाही आम्हीच सर्वकाही करतो अशा फुशारक्या मारणा - या व सातारा विकास आघाडीच्या मार्गदर्शना खालील नगर पालिकेच्या आरोग्य विभागाने जंतूनाशकाबरोबरच कोविड बाधीत मयतंच्या अंत्यसंस्कारासाठी कैलास स्मशानभूमीत रचण्यातआलेल्या सरणाच्या लाकडात किती मलीदा लाटला हे प्रसिध्दी माध्यमांनीच जगजाहीर केले आहे . एकदाची त्या जंतूनाशकाची तपासणी करा म्हणजे कुणाकुणाच्या पोटात मलिदयाचे किडे शिरलेत हे ही जनते समोर येईल . 

नगर पालिकेत मर्जीतल्या ठेकेदारांनाच काम मिळावे यासाठी चार चार वेळा निविदा काढून केलेला निविदा कामातील भ्रष्टाचार तसेच नगराध्यक्ष , उपनगराध्यक्ष , सभापती यांच्यासह सातारा विकास आघाडीतील कोणाकोणाला किती टक्केवारी द्यावी लागते हे तुमचेच नगरसेवक वर्तमानपत्रातून जाहीररित्या आरोप करीत असतात . एकमेकांची उणीदुणी काढण्यात आघाडीवर असलेली सातारा विकास आघाडी असाच लौकिक तुम्ही .मिळवला आहे . कोटयावधीच्या विकास कामांच्या बढाया मारणा - यांनी हद्दवाढीत नव्याने समावेश झालेल्या भागासाठी किती निधी आणला हेही जाहीर करावे . भुयारी गटर योजनेतला बटयाबोळ , सोनगाव डेपोची दुरावस्था , घटांगाडीतला घपला आणि घंटागाडीवाल्याचा आत्महत्येचा प्रयत्न , सफाई कामगारांचे चार चार महिने रखडणारे पगार , प्रकाश योजने खालील बजेटचा भ्रष्टाचार , खुलेआम सुरू असलेले कमीशनराज आणि स्वच्छतेच्या नावाखाली नगरपालिकेच्याच तिजोरीची सुरू असलेली सफाई यातच गुरफटून समक्षतेचा डांगोरा पिटणा - यांनी विकासकामांच्या आणि पालिकेच्या सक्षमतेच्या वल्गना करू नये , असेही यावेळी मोहिते यांनी नमूद केले आहे .


 

Post a Comment

0 Comments
* Please Don't Spam Here. All the Comments are Reviewed by Admin.

Top Post Ad

Below Post Ad

Hollywood Movies